طبعا التوفيق دة من عند ربنا، بس إحنا كمان لازم نكون عاملين اللي علينا.
أولاً: أول لما تدخل الانترفيو بتسلم علي اللي بيعملك الانترفيو ... السلام بيكون فورمال يعني انه ميمدش ايده الا لو بادر الشخص بالسلام.
Hello... How are you
ثانيـاً: خلال الانترفيو في حاجات لازم تخلي بالك منها
1- خليك واثق من نفسك و مستعد كويس و كمان متفائل.
2- لازم يكون عندك معلومات كويسة عن الشركة زي جنسيتها عملائها المستهدفين بتشتغل ف ايه بتقدم خدمات اية و منتجاتها اية كمان تكون عارف المنافسين و مقر الشركة الرئيسي و حجم الشركة و فروعها.
3- تعرف الوظيفة اللي انت مقدم ليها و تعرف هيا محتاجة اية كويس و تعرض نقاط القوة في شخصيتك اللي هتخليك افضل مرشح.
4- تسمع اللي قدامك كويس اوي و تركز ف الاسئلة و في المعلومات اللي بيقولها.
5- لازم تبص في عين اللي قدامك مينفعش تبص في الارض او تسرح في حاجة لوحة مثلا علي الحيطة او تسريحة البنت اللي بتعمل الانترفيو او اي حاجة ملفتة للنظر خالص
6- تجنب الاجابات القصيرة او الرد المبهم، برده تجنب الاجابات الطويلة اوي عشان متتوهش منك الفكرة ومتزهقش اللي قدامك.
7- ممكن وانت بتتكلم تعبر باديك بس مش اوفر عشان بيكون عيب، لغة جسدك بتعبر عنك فلازم تكون حريص وانت بتستخدمها.